هو ايه اللي بيحصل في مصر بالظبط ؟؟؟ تعالى وانا اشرحلك الخطة باختصار

كل الناس بتسأل

هو ايه اللي بيحصل في مصر بالظبط ؟؟؟

قولت اكتب الكلام في موضوع
بدل ما اقعد احكيه للناس العاقلة واحد واحد

الحكاية باختصار
ان الجيش عايز يسلم البلد للبرادعي من يوم ما مبارك تنحّى

ليه و ازّاي؟
ده كلام يطول شرحه
بدأت اكتب فيه من زمان
و هابقى انشره بعدين ان شاء الله

المهم باختصار ان من بين الاسامي المطروحة امريكا مش قابلة غير البرادعي
و انتخابات نزيهة مش هاتجيب البرادعي، لان مالوش الشعبية الكافية
فا مهمّة الجيش هو تحقيق مطلب امريكا بس مش بالتزوير
بالديموقراطية و الالاعيب السياسية

المهم
بعد عدد من المكائد و المؤآمرات عشان البرادعي يستلمها

جه ابو اسماعيل زنقهم

قال لهم المطلب الوحيد
تسليم السلطة قبل 30 ابريل
و طبعاً يستحيل تلميع البرادعي قبل 30 ابريل

فا اللي حصل
ان بعد ما ابو اسماعيل دعى يوم الجمعة لعدم الاعتصام حرصاً على انتخابات مجلس الشعب
و حرصاً على علاقته بالسلفيين و الاخوان

المجلس العسكري قرّر انّه يلعب لعبه اكبر من كده

المجلس العسكري قرّر التصعيد مع الناس اللي في التحرير
تصعيد بأسلوب خبيث جداً
دخل ضرب الناس بمنتهى القسوة من يوم السبت الفجر، بعد ما السلفيين و الاخوان و ابو اسماعيل مشيوا
فا طبعاً الناس فضلت تلعن في ابو اسماعيل
و الاعلام فضل يقول لهم ده ضحك عليكم
اعتصام بعد كده مفيش اعتصام
و بدأت شعبيته هو و الاخوان و السلفيين تقل

و الضرب في المتظاهرين كان ليه كذا قاعدة
اولاً، الضرب يكون عنيف جداً
ثانياً، بالرغم من عنف الضرب، مطلوب ان الاعتصام مايتفضّش يعني ضرب جامد
و قتل و سحل
مع عدم فض الاعتصام

لييييه ؟؟؟
عشان الناس تجيب بعضها
لإن اوّل ما بيكون في دم
الامور بتسخن مش بتهدى

و بدأت مجموعة من الصفحات المتواطئة تعللي التون
انزلوا انزلوا انزلوا
و الناس بدأت تنزل بالالافات فعلاً
و كان ايه التعقيب الاعلامي للمجلس العسكري ؟؟
قال الانتخابات مش هاتتأجّل

طب ليه قال كده ؟؟
عشان الاخوان و السلفيين يستنّوا الانتخابات
مش عشان الاخوان و السلفيين طمّاعين ولا حاجة
و لكن عشان شايفين ان الانتخابات هاتحمي دم ناس اكتر من اللي ماتوا
و هاتخلق شرعية منتخبة في البلد تهدّي الدنيا
و هاتخللي تسليم السلطة 30 ابريل ممكن
بينما الاعتصام هايأدّي للتأجيل اكيد

و ده كان رأيي شخصياً انا كمان
ان الانتخابات هي السبيل الوحيد للحفاظ على دم الناس

فا كان المخطّط
ان المجلس من ناحية يضرب الناس بعنف مع عدم فض الاعتصام
و من ناحية تانية، يفضل يغنّي ان الانتخابات مش هاتتأجّل

طبعاً الاعداد فضلت تزيد في التحرير
و بدأوا يشتموا في كل اللي تخلّوا عنهم و مانزلوش

اللي همّه الاخوان و السلفيين

طيب، ليه عملوا كده؟؟

كانوا عايزين الناس توصل لاستنتاج ان المجلس قتل و سحل و حرق
و يستحيل نصبر عليه ولا حتى ل30 ابريل

و البرادعي ينزل السبت بالليل
يقول انا متعاطف معاكم

و فعلاً كان اعلن النزول
و جه بعد كده سحب كلامه

و تفضل الناس معتصمة
مش عارفه ازّاي هاتعيش مع المجلس اللي قتل و ضرب

طب ايه المخرج اللي قدّام الناس المعتصمة ؟؟
المخرج طبعاً حكومة انقاذ برئاسة البرادعي

فا البرادعي يقول انا هانقذكم من المجلس
الناس اللي في التحرير تقول هيييييييه، لإن التحرير ولا فيه اخوان ولا سلفيين
يبقى البرادعي اخد شرعيته من الناس اللي في التحرير، و محدّش له عنده حاجة

طبعاً هايقول انا رئيس حكومة
بس ليّا كامل الصلاحيات، لإن عصام شرف كان مالوش لازمة
و انتم شفته من غير صلاحيات كان ضايع ازّاي
و يبدأ يلعب براحته

اول لعبة
يا جماعة قانون الانتخابات معيب
و تقسيمة الدوائر رهيبة
و الحالة الامنية ضايعة
خصوصاً بعد ما المجلس العسكري مشي

ايه رأيكم نأجّل الانتخابات؟؟

فا الاعلام يقول هو ده الكلام
و النخبة تقول عين العقل
و الاحزاب كلّها توافق

ماعدا مين ؟؟؟
الاخوان و السلفيين طبعاً

لكن مين هايسمعلهم ساعتها؟؟
مش دول الكلاب اللي سابونا نتقتل في التحرير ؟؟
سابونا نتقتل عشان الانتخابات
و دلوقتي مش عايزينها تتأجّل
عشان كل همّهم مصلحتهم
و البرادعي ده اصلاً واخد شرعيته من الناس اللي في التحرير
و الاعلام يغنّي
فا الاخوان يحطّوا لسانهم في بقّهم و يستجيبوا للتأجيل

طبعاً واحده واحده
البرادعي هايعمل اللي عايزه كلّه
هايقلوظ الدستور
امّا بمواد حاكمة او من خلال مجلس شعب متقلوظ

و يا هايعمل انتخابات رئاسة يكسبها
يا يفضل يأجّل فيها مع كذا سبب

طبعاً الامن يرجع الشوارع
و الاقتصاد يفوق
و التحرير يفضى
و الناس تنبسط... ساعتها انتخابات الرئاسة مش هاتفرق مع الناس اوي

و حتى لو تمّت
هايبقوا فرحانين بالمنقذ
فا ينتخبوه

طيّب ليه الدنيا مامشيتش كده ؟؟

اللي حصل بأه ان ابو اسماعيل ادرك الامور السبت بالليل
و راح لاغي الدرس بتاع يوم السبت، و طلع على الميدان وسط مسيرة من مؤيّديه
عشان الناس في التحرير ماتنفعلش عليه و هو داخل لوحده
بعد ما اتبرمجوا على ان ابو اسماعيل جبان و باعهم
و نزوله تم بالرغم من رفض الاخوان و السلفيين للتحرك ده، و هجومهم الشديد جداً عليه
البرادعي كان مخطّط انّه ينزل الميدان يوم السبت
و كان مخطّط ان المشير يطلع ببيان في نفس اليوم
لسبب ليه علاقة بخطّة البرادعي
اوّل ما ابو اسماعيل نزل
الخطط باظت

و ابو اسماعيل كان ذكي جداً
ادرك كذا حاجة
اولاً، الاعتصام مش هايتفض مهما دعا لفضّه... و بالتالي دعوة الناس لفض الاعتصام هاتقابل بهجوم شديد، زي اللي حصل مع العوّا
فا قال لهم انا معتصم معاكم، و انتم عندكم حق
ثانياً، ادرك ان الاخوان و السلفيين اهم حاجة عندهم الانتخابات، و ان المجلس بيلاعبهم بيها عشان ماينزلوش
و بالتالي لعب نفس اللعبة عشان مايخسرهمش
قال اهم حاجة عندي الانتخابات
بالرغم من يقينه بإن كده كده مستحيل تتم انتخابات
بس ماكنش عايز يكون هو السبب في تأجيلها
ثالثاً، ان الوقت مش في صالحة
كل ما الوقت هايمر
الغضب في التحرير هايزيد، و دخول الميدان هايبقى اصعب
عشان كده نزل بسرعة يوم السبت
لان على يوم الحد مثلاً، كان مستحيل يدخل الميدان
حتى لو في وسط مليون مؤيّد

التناقض بأه بين دعوته للاعتصام و بين انّه مصمّم على الانتخابات هو ده اللي كنت مستغرب له
ماحنا يا نعتصم و نلغيها
يا نروّح و نعملها

انما هو كان باصص على حاجة اهم بتحصل
شرعية الميدان

اللي هي ببساطة
ان لو اتجمّع مليون واحد في الميدان و رفعوا مطلب
يبقى الشعب يريد

و بالتالي من الخطأ ان الواحد يبقى بعيد عن الميدان

الاخوان و السلفيين للاسف ما ادركوش دي
او ادركوها متأخّر

فا جه البلتاجي لمّا حاول النزول
الناس هاجت عليه

و السلفيين لمّا حاولوا ينزلوا في اسكندرية
الناس هاجت في الاوّل
و بعد ما الناس اطمأنّت
بدأت الشرطة تضرب رصاص حي في السلفيين
بدعوى ان السلفيين جايين يهجموا على المديرية

طبعاً المقصود ان السلفيين يقعدوا
و الاخوان يقعدوا

الحاجة الوحيدة اللي مانعة خطّة المجلس لتسليم البلد للبرادعي دلوقتي
هي وجود ابو اسماعيل

طب الحل ايه ؟؟؟

الحل انّنا ندرك ان كده كده مفيش انتخابات مجلس شعب يوم الاحد
ابو اسماعيل بيقول ان الانتخابات لازم تتم بس عشان مايبقاش شمّاعة للتأجيل اللي هايتم
و عشان علاقته بالسلفيين و الاخوان ماتبوظش
انما الانتخابات هاتتأجّل هاتتأجّل

طيب نعمل ايه ؟
ننزل الميدان
عشان نكون جزء من شرعية الميدان

و نبعد عن اماكن الصدامات
كده كده همّه عمرهم ما هايدخلوا الميدان
لإن الهدف الابقاء على الاعتصام
مش فضّه

و اوّل ما يقولوا حكومة برئاسة البرادعي و كامل الصلاحيات
نرفع جزمنا في وش الكاميرات
و نستمر في الاعتصام
عشان البرادعي يفقد شرعية الميدان

ده الحل الوحيد
غير كده
يبقى بنسلّم البلد للبرادعي

و ربنا يحفظ ابو اسماعيل و يسدّد خطاه
لانّه فعلاً هو العقبة الوحيدة في طريقهم

جزاكِ الله خيراً أختنا

تحليل منطقى وواقعى

جزاك الله خير

» هل يجوز قراءة القرآن وانا جنب؟
» ما المراد من قوله تعالى (( أو لامستم النساء )) ؟
» لا ترمى زجاجات الحاجه الساقعه تعالى شوفى
» الإعجاز العلمي في قول الله تعالى (إِنَّ اللَّهَ لاَ يَسْتَحْيِي أَن يَضْرِبَ مَثَلاً مَّا بَعُوضَةً فَمَا فَوْقَهَا.. )